أولادي يقلدون والدهم ويضربونني!

السلام عليكم انا زوجة ولدى ثلاث اطفال تزوجت كما يقولون عن حب زميلى فى الجامعه وتغاضيت عن اى طلبات مادية ولم اهتم بوضعه المادى مطلقا ووعدنى بالحب والاحترام والسعاده وبعد الزواج بشهر بدات المشاكل والاهانات طول ما انا كويسه معاه وبعمل كل اللى عايزة بيعاملنى كويس لكن عند اى تفصير او اى غلطة او النرفزة مع الاولاد مثلا يضربنى بعنف شديد ويخنقنى وفى مرة ضربنى حتى فقدت الوعى غير السباب الدائم عند الخلاف واحيانا السب بالاهل وبعد الضرب يتصل بوالدى ويشتكينى له ثم يخاصمنى وفى البدايه كنت بعد كل هذا انا اصالحه واحاول استرضيه بشتى الطرق ويذلنى على ما يوافق نتصالح ومن فترة فكر فى الزواج على بسبب انه لايشعر بالسعاده معى ومن حينها لم اعد اطيقه وحتى لما يضربنى بقيت ادافع عن نفسى ولو شتمنى للاسف بقيت ارد عليه مبقتش اعرف اتحكم فى اعصابى واسكت او اخاف منه زى الاول من وجهة نظرى انه اذانى جميع انواع الاذى من ضرب لسب لطلاق مرتين للاستفزاز والضرب والاهانه وبعد ان اخرج عن شعورى ولا استطيع التحكم فى اعصابى اصرخ او اكسر اى شئ امامى يسجل هذا صوت او صورة ويطلع عليه صديقه واهلى انا حاسه انى عايشة ماساة ومشكلتى ملهاش حل حاولت معاه التكلم بهدوء او الخصام او الابتعاد ومفيش حاجة جايبة نتيجة وكمان شايف نفسه هو المجنى عليه يعنى لو شتمنى ورديت ابقى مش متربية لو قال هتجوز وقلتله خلاص لو هتتجوز تطلقنى وانا كمان اتجوز يقولى لا حتى لو اتجوزت انتى لا مش هتطلعى من عندى غير على قبرك ممكن يكون بيمدح فيه ويقولى احلى كلام وتانى يوم لو اختلفنا يسبنى ويقولى كلام صعب انا اعصابى انهارت غير ان ضربه ليا امام الاولاد خلاهم هما كمان يقلونى ويضربونى بنفس الطريقة اللى شافوه بيضربنى بيها مع انهم صغيرين مش فاهمين هما بيقلدوا وخلاص وانا تعبت جدا نفسيا وجسمانيا مبقتش استحمل ومبقتش اعرف اسيطر على انفعالاتى لو ضربنى وشتمنى بقيت ارد واتعصب واكسر مش عارفه اعمل ايه