أهل زوجي أخترعوا المشاكل لكي ننفصل

السلام عليكم مشكلتي مش مشكله واحده دول شويه مشاكل في بعض اولها اهل زوجي اللي ديما يخترعوا مشاكل علشان ننفصل انا وهو وبالفعل نجحوا في ده مرتين وانفصلنا ورجعنا علشان اولادنا احنا متجوزين من ٩سنين ومعانا ٣ اطفال .دلوقتي هما مشونا من البيت لاننا قاعدين في بيت عيله طردونا من شقتنا واجرنا شقه بعيد عنهم بس بعد ٨ سنين مشاكل وطلاق مرتين .. تاني مشكله هو زوجي نفسه هو اتجوزني جواز صالونات اتخطبنا شهر واتجوزنا هو تقريبا مش بيحبني لانه خاني كتير كان بيكلم بنات علي النت كتير جدا ويعشمهم بالجواز كانوا بيتكلموا في كل حاجه ..وانا اللي هو مراته لما سافر كان يقولي مش فاضي من الشغل وتعبان ويكلمني دقيقه ويقفل ..انا بصراحه كنت شاكه فبه فعملت اكونت باسم واحده تانيه ودخلت كلمته ..والله من اول مكالمه قالي هتجوزك وبحبك ومش بحب مراتي وانا عايش معاها علشان اولادي وكلام كتير يحرق الدم ..طب واجهته كتييير اوي وانكر وقال مش هعمل كده تاني ..وبرضوا بيعمل كده وانا اخر ما تعبت مبقتش ادور وراه ..بس اللي تاعبني حاليا انه بيسافر ومش عامل مستقبل للاولاد يعني زي ما بيروح زي ما بيرجع هيه مصاريفنا بس لاكن توفير لا ..لما قولتلوا ارجع وكفايه غربه خرب الدنيا وقالي مش هنلاقي ناكل ..انا نفسي يعيش معانا بس هو مش راضي ..ونفسي يديني حق من حقوقي وهو الاهتمام ببقا محتاجه افضفض معاه واحكيلوا قد ايه انا تعبانه من غيروا ومن مسؤليه الولاد ببقا عاوزه اتكلم معاه زي اي اتنين صحاب حتي ..مش بلاقي غير كلمه تصبحي علي خير انا هنام ..وببقا عارفه وواثقه انه مش هينام ..انا بقيت بكره نفسي بسببه لاني حاسه بنقص كبير علشان هو مش بيخب يتكلم معايا مع ان الحمدلله شكلي كويس ومش بقصر معاه في حاجه ولا مع اولادي ..والمرتين اللي اطلقنا فيهم كان بسبب اهله وبسبب الاهمال وقله حبه ليه بس كنت برجع ليه لان مسؤليه الولاد كانت ضعبه اوي عليا لوحدي وانا مش بشتغل واهلي بيرفضوا ان ابقا مطلقه واشتغل قال ايه خايفين عليه ..فكنت برجع غصب عني بسبب الظروف .. دلوقتي هو مسافر وعمالا يتفسح شمال ويمين ولا سأل فيه وولادي كل شويه عند الدكتور ..ببقا نفسي يشاركني يومي يطمن عليهم وعليا يقولي ايه مزعلك او محتاجه ايه يشيت معايا بدل ميتكلم مع واحده غريبه ..زهقت محتاجه افضفض مليش حتي صحاب مانع عني كل حاجه مش عاوزني حتي اكلم قرايبي ..حاسه بوحده رهيبه جالي اكتئاب اقسم بالله ..قولولي اعمل ايه معاه والله لولا اولادي لسبته بس جربت وفشلت ..وحاولت اقرب منه كتير وهو بيتجاهلني خالص ..انا اسفه لو كلامي ملغبط بس والله مش بعرف ارتب الكلام لان مش متعوده اتكلم مع حد ..والله لما بتكلم مع اهلي بتهته في الكلام واتلغبط بسبب الوحده اللي انا فيها دي..والله المستعان