ضعف شخصيتي بدأ منذ الصغر واستمر حتى بعد زواجي

السلام عليكم ورحمة الله وبركاته.. امرأة متزوجة عندي 24سنة مشكلتي بدأت من وانا عندي 13سنة ..ما بحب العلاقات الاجتماعية ما كنت احب اخرج مع اهلي مشاوير وهيك دايما كنت بحب العزلة وبرتاح لما بقعد لحالي واصفن بالسماء والشجر والطريق والناس اللي بتمر من باب بيتنا.. اتعودت اكون لوحدي ..بالمدرسة ما كنت كلم حدا وما كان عندي اصحاب واخاف اتكلم مع حد وازا حكيت بخجل كتير وبيتغير لوني وبيصير احمر وبتلعثم وصوتي بيرجف لما بحكي دايما المدرسات بيشكو لماما اني ما بشارك بالصف معهم وكانو يفكروني مو شطورة وماما كان تبهدلني كتير وتقولي انو كل اخوتي من الاوائل ليه انا مو متلهم ..هاد الكلام زاد حالتي سوء مو حسنها ..لحد ما صرت بالثانوية العاامةقررت انو لاازم اتغير .نجحت فعلا وحصلت اكتر من اخوتي وقررت اتغلب على الرهاب الاجتماعي اللي كنت بحسو بيلاحقني ..فدرست مهنة فيها اجتماعيات كتير ولكن ما حسيت اني اتغيرت لساتني ما بعرف ارد على الناس صح وبفكر بالرد الف مرة قبل ما احكيه وبتوتر وبصير افرك بايديا واطرطقهم واتصبب بالعرق ..كان يتقدم لي عرسان كتير ولكن كنت دايما افكر كيف اتزوج وانا لسه ما اتغلبت ع مشكلتي ..ولكن بالنهاية اجبرت على الزواج واتزوجت وبدأ مشوار تاني مع الحماة والسلفة .. سلفتي بتشتمني عيني عينك بس ما بعرف ارد .. دايما بتقلل من شأني وقيمتي وبتحسسني اني غريبة عن بيت حماي ..بس انا مو معنية اعمل معها مشاكل او ارد عليها لاني انا ما بنزل تفكيري لتفكيرها نهائي وعندي قناعة انو انا لزوجي وابني وبس وما في حد رح يحط شي بجيبي لما يتمسخر علي او يفتعل اللي مشاكل وانا في غنى عنها ..في مقابلات العمل بفشل لانو ببساطة بكون خايفة ازا جوابي عجبهم او لا ..انا ما بدي افضل ع هالحال بدي اكون انسانة قوية ما اخاف ولا ارتبك ولا افكر بالرد صح ولا غلط ..انا هلا بكتب هالكلام وانا خايفة ومتوترة ازا هالكلام رح يخلي الناس تقول عني شي سلبي او لا وشكرا على قراءة قصتي .