أشعر أن عقلي متوقف

السلام عليكم اخوكم سالم من المملكه العربيه السعوديه العمر 25 سنه الحاله الاجتماعيه اعزب الحاله الماديه متوسط الدخل ملتزم بصلاتي الحمدلله الي فيني شيء غريب مدري كيف اقولة مادريت هو مرض هو مس هو اكتئاب احس اني مو طبيعي في شيء فيني مو موزون في شيء متغير ومزعجني جداً العقل معلق او فيه شيء ماسكه احسه صار ثقيل وماله نفس فيني حتى اول شيء عملي كنت احب عملي جداً واستمتع فيه جداً .. الحين اشتاق للعمل واروح اداوم مجرد ما امسك شغله بسيطه خلاص احس نفسي شردت مدري وين صرت ويلازمني الشرود على طول راحت المتعه الي كنت احسها وانا اشتغل صرت ما احس بلذة للحياه كل شيء عادي جداً وممل رحت ثلاث مرات للدكتور اقوله في شيء براسي مو طبيعي في شيء غلط يفحص الدم والضغط وكالعاده يعطيني دواء للمعدة ما ادري ايش صابني فجاه قسم بالله اعاني معاناة من الشيء ذا والمشكله ما ادري ايش فيني بالضبط ابي حد مرت فيه هالحاله يقلي وش سوى وش صار عليه ،طولت الشرح واحس اني ما وصلت المشكله شكراً لكم جميعاً