أخاف من الجميع والسبب ما حصل لي قبل سنوات

انا دكتورة فى اخر سنه فى طب بشرى بنت رجل مهم ومنصبه حساس ومهم لاقصى درجة ممكنه داه اللى الكل بيقوله وبسمعه اما بالنسبالى هو احن واعظم اب فى الدنيا وانا فى ٢ ثانوى حصلى حادثة مازلت ليها تأثير كبير فى حياتى للحظة دى. اهلى كانوا بره البيت بابا كان عند عمتى وعمى وماما كانت مع خالتى واختى واخويا بره وانا كنت لبست عشان راحه درس وبصلى قبل ما اخرج سمعت صوت دوشة بره اوضتى فكرت حد من اهلى رجع قلعت عباية الصلاه وبلم كتبى وخارجة الكلام داه فى غضون ٣ دقايق سمعت اصوات غريبه مكنتش فاهمه حاجة ومتخيلتش للحظة اى حاجة بفتح الباب كانوا خمس اشخاص مقدرش اوصف حالة الفزع ساعتها غير ان بتمنى ان اللحظة دى تتمحى من حياتى كانوا بيدوروا على ورق فى مكتب بابا صدفة ان جارتى لاحظت ان فيه حاجة غريبه بتحصل وطلبت من جيرنا انهم يرنوا عليا والا كنت مش عايشه للحظة دى اقدر اقولكوا ان انا حاليا عايشة بإعاقة جسدية ونفسيه كبيرة من حيث الإعاقة الجسدية مع العلاج اقدر اقول انه لحد كبير متحسنه اما النفسية فهى تكاد تكون مهلكة لسه فاكره صوت كل شخص فيهم فاكر كلمتهم وهما بيقولوا خلى عدالة ابوكى تنفعه لما ياخدك جثة ويتحسر بعد كدا انا اتحجزت فى المستشفى فترة وكان امل ان اعيش سليمة واحد فى المية حادثتى فى الوقت داه كانت حادثة ترج لها الاسماع كانت من الحوادث النادرة مش زى دلوقتى طبعا .المجرمين لسه متمسكوش وداه شئ راعبنى لدرجة غير طبيعيه فاكرة ازاى ضربونى ازاى كانوا كاتمين نفسى وانا بصرخ فاكرة عجزى ساعتها فاكرة نظرة كل شخص منهم فاكرة توسلاتى ليهم لسه فضلت فترة كبيرة فى عزلة تامه عن كل الناس كل ما امشى فى الشارع ببقى خايفه من كل اللي حوليا مبقتش انام لوحدى نهائى من بعد الحادث بعدت عن كل صحابى حتى الانسان اللي بحبه واتخطبنا بخاف منه وبقيت افكر بدل المره الف ان اسيبه عارفه ان مش هعرف اكون اسرة سوية ولا اسعد ولادى ولا جوزى بحياتى دى الحادثة مر عليها عمر بس انا لسه فاكرها وحاسة بكل لحظة فيها كأنها بتحصل قدامى دلوقتى