مطلقة وحبيبي وعدني بأن أكون زوجة ثانية لكن ما حصل صدمني

بليز عاوزه حل ونصيحه لاني مخنوقه ومشتته جدا. انا عندي ٢٩سنه ومطلقه وبشتغل شغل كويس اوي ومتفوقه فيه كنت مرتبطه بشخص من واحنا في الجامعه ومحصلش نصيب وبعدنا ومعرفناش عن بعض حاجه واتجوزت حصلت مشاكل مكملتش سنه وانفصلت عن زوجي وبالصدفه شوفت الشخص اللي كنت بحبه بعد طلاقي ورجعنا ارتبطنا ببعض وعلشان العادات والتقاليد منفعش اننا نتجوز بسبب اهله رفضوا علشان انا مطلقه وهو مش متزوج قبل كده وسبنا بعض تاني وبعدنا وهو اتجوز وبعد سنين من وقت ماسبنا بعض ومكناش بنتكلم نهائي وكل واحد في حاله رجع يكلمني ويبعتلي رسايل انا حنيت ورديت لأنه اكتر انسان حبيته وأول حد عرفته. هو طلب يتجوزني كزوجه تانيه وقال إنه هيعدل مابيني وبين زوجته ومش هيفرق مابينا واننا لو بنحبه احنا الاثنين هنسعده وهيجيب اهله ويتقدملي وانه هيعوضني عن السنين اللي راحت وانه بيحبني جدا ومش هيستغني عني ابدا لكن قالي ان زوجته مش هتعرف بموضوع زواجنا غير بعد فتره لما الأمور تستقر علشان المشاكل واتفقنا علي كده انا كنت محتاره اتصرف ازاي انا بحبه من قبل زوجته ماتعرفه ومحبتش غيره واتقدملي ناس كتير مارتحتش لحد ودايما كنت بفكر فيه وفي نفس الوقت كنت خايفه اكون بظلم زوجته لانها ملهاش ذنب ومش عاوزه اتجوز أي واحد بيتقدملي وخلاص لان ده الإنسان الوحيد اللي حبيته وكنت عاوزه استقرار وميحصليش اي مشكله في زواجي تاني. المهم اتفقنا علي الزواج واتعلقت بيه جدا اكتر من الاول وحدد ميعاد لكتب الكتاب وحصل أنه زوجته عرفت الموضوع ده ووقعت بيني وبينه بطريقه ما وارسلت رسائل علي أساس أن انا اللي ارسلتها وهو صدق الكلام ده وأهله صدقو وكلمني ونهي اللي مابينا وحاولت أفهمه اني انا ما ارسلتش الرسائل دي وإني مظلومه ومعرفش أي حاجه عن الموضوع ده مسمعليش نهائيا ده غير أن زوجته اتصلت بيا وهزأتني وانتهي الموضوع علي كده. انا دلوقت موجوعه اوي لدرجه محدش يتخيلها لاني اتظلمت وهو مرضيش يسمعلي ولا يسيبني ابرر موقفي ولاني اتعلقت بيه اكتر من زمان ومبقتش عارفه أعيش زي الاول مش مصدقه انه يعمل فيا كده بتغير عليا مابين يوم وليله بالمنظر ده ونفسي يسمعلي ويعرف الحقيقه وحاسه أنه عرف اني مظلومه لكن مش بيتراجع خوفا من زوجته.. نفسي نرجع لبعض او حتي إنه كرامتي تتردلي بأنه يعترف بغلطه في حقي انا مش عارفه اعمل ايه