زوجي يتخذ قرارات مصيرية وكأني غير موجودة بحياته

والله مني عارفه كيف ابدأ مشكلتي..وصلت لمرحله يأست اشتكي لأحد... لكن قلت ارسل مشكلتي وان شاء الله تساعدوني.... انا من قبل قد رسلت مشكلة انو زوجي ناوي ع الغربه وانا رافضه وبعدين اقتنعت بكلامكم واني اكون تبع زوجي مكان مايروح... دحين وافقت اروح مع زوجي مكان ماارغب اعيش فيه ورح اترك اهلي وعائلتي وكل معارفي واروح للغربه بس اظل انا وزوجي وابننا سوا.. المشكله انو الدوله الاوربيه اللي كنا بنروحها المعاملة اتوقفت عندي وعند ولدي ورفضوها وزوجي اموره مشيت.. زوجي هذي الفترة سافر لكم دولة وانا عند اهلي جالسه اخر دولة راحها كانت اللي قرر نروحها وماتيسرت لي.. وبعد ماراحها اعطاني خبر وهو هناك ولا قالي انو مسافر لها انا مره زعلت انو دايما يتصرف بدون مايأخذ رأيي في امور السفر والمعيشه.. جلس تقريبا اسبوع ورجع.. وبعد مارجع حكالي انو كان بيجلس سنه.. لكن اموره مشيت وانجزها ورجع وماطول.. انا هنا انصدمت والله مااعرف كيف اوصف لكم شعوري والله كرهت الحب اللي بقلبي له حسيته بيسافر ويقعد سنه وعادي عندو.. وكان قد حكالي انو اصحابه بيقولوله لو عاش لوحده سنه بأوربا بيقدر بعدين يجيبنا له.. لكن هو قالي انو مابيقدر يتحمل يبعد عني وعن ابنو اكتر من شهرين.. ودحين باقله بتروح تقعد سنه بدوننا فين كلامك اللي اول قلته لي... والله مو حاسس فيني انا اتشحطت معاه من مدينة لمدينة ومن دولة لدولة واخر شيء رجعت لأهلي وماصار لي بيت وحياتي مجهوله حتى اهلي هم كثيييير يحبوه بس حزنانين علي كل بنات العايله مستقرين مع ازواجهم الا انا.. وهذا وانا مااحكيلهم.. زوجي كتوم ويقرر ويخطط لوحده انا ماانكر انو تفكيره حكيم بس التفكير العقلاني مو كل شيء.. يعني هو لو تركني بالشهور ولا سنه انا رح اتغير... قلتله خلاص انت عيش حياتك وانا اعيش حياتي... والله اني تعبت احيانا بفكر اقول خليه يسافر وانا اشتغل.. بس المشكله صعب جدا اشتغل هنا انا والله معد فيني اتحمل الغموض هذا.. ولمن اقله كذا.. يقلي عندك خيارين تعيشي مع اهلك ولا اوديكي عند اهلي في دوله فيها حرب ومهي مستقره وهو طبعا يسافر.. وانا مستحيل اعيش مع اهله انا اصلا رافضه اعيش معاهم الا للضرورة ويكون هو معاي... وللامانه هو انسان مستقيم وطيب ويحبني الحمدلله لكن قوة قلبه ماادري كيف يجيبها.. سرت باقله الله يعطيني نفس احساس قلبك.. واقدر استغني عنه زي ماهو يقدر يستغني عننا.. والله حتى ابننا لا يفتقده ولا يسأل عن ابوه من كثر ماابوه بعيد عننا عمره 4 سنوات..... اعطوني حل كيف اتفاهم معاه.. انا قلتله الحياة ماتسوا اننا نعيشها بعيد عن بعض عشان ايش فلوس وهو اصلا يقدر يمشي حالو لأنه ماشاءالله عنده خبره في اعمال كثيرة.. لكن هو مايرتاح في المكان اللي انا ارتاح اعيش فيه... والله انا بشوفه اناااااااااااااااني ولا هو حاسس فيني وانا بحكيله متأكده لو وحده غيري مابتتحمل الحال هذا.. ويقلي انا من لي غيرك.. سامحوني ع الاطاله قلبي ملياااان والله.....